Ծաղկազարդ. Յիսուսի յաղթական մուտքը Երուսաղէմ

Հայ Եկեղեցին Ս. Յարութեան տօնի նախորդող Կիրակին կը նշէ Ծաղկազարդը, որ Քրիստոսի յաղթական մուտքն է Երուսաղէմ: Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի բարձր տնօրինութեամբ Ծաղկազարդը հռչակուեր է մանուկներու օրհնութեան օր, քանի որ Տիրոջ՝ Երուսաղէմի տաճար մտնելու ժամանակ մանուկները կ’աղաղակէին՝ ըսելով. «Օրհնութի՜ւն Դաւիթի որդուն» (Մատթ. 21:15): Այդ օրը եկեղեցիներուն մէջ կը կատարուի Մանուկներու օրհնութեան կարգ:

Յիսուսի մուտքը Երուսաղէմ ժողովուրդը ընդուներ է խանդավառութեամբ` ձիթենիի և արմաւենիի ճիւղերու հետ իրենց զգեստները փռելով ճանապարհի վրայ և աղաղակելով. «Ովսաննա՜ Բարձեալին, օրհնեալ ըլլայ Ան, Ով կու գայ Տիրոջ անունով, օրհնեալ ըլայ մեր հօր` Դաւիթի թագաւորութիւնը, որ կու գայ: Խաղաղութիւն երկնքի մէջ և Փառք բարձունքներուն վրայ» (Մարկ. 11:9-10):

Ըստ Եկեղեցւոյ հայրերուն՝ Յիսուսի առջև հանդերձներ փռելը կը խորհրդանշէ մեղքերը Քրիստոսին խոստովանիլը: Ոստեր և ճիւղեր ընծայելը ընդհանրապէս առանձնակի պատիւներ և հանդիսաւորութիւն կը նշանակէ: Ձիթենին ընկալուեր է որպէս իմաստութեան, խաղաղութեան, յաղթանակի և փառքի խորհրդանշան: Մեռեալ Ղազարոսին յարութիւն տուած Քրիստոսին ձիթենիի և արմաւենիի ճիւղերու ընծայումը կը խորհրդանշէ մահուան հանդէպ յաղթանակը:

Ծաղկազարդը կը խորհրդանշէ նաև արարչութեան առաջին օրը, երբ Աստուած ստեղծեց երկինքն ու երկիրը, և լոյսը տարածուելով՝ հալածեց խաւարը:

Այս օրը կը խորհրդանշէ նաև առաջին ժամանակաշրջանը, երբ բոյսերով ու ծաղիկներով զարդարուեցաւ երկիրը, և Ադամն ու Եւան ուրախացան Դրախտի մէջ: Եւ ինչպէս առաջին ժամանակաշրջանին Կայենը նախանձէն սպանեց Աբելը, այդպէս ալ հրեաները, չարը խորհելով, սպանեցին Քրիստոսը ու դարձան Կայենի անէծքի ժառանգորդները:

Ծաղկազարդի օրը՝ հրէական Զատիկէն հինգ օր առաջ, Քրիստոս Իր կամքով եկաւ Երուսաղէմ՝ Իր չարչարանքներուն վայրը, որպէսզի ցոյց տայ, որ Ինքն է Աստուծոյ Գառը, Ով՝ կը կամենայ պատարագուիլ մեր փրկութեան համար: Քանզի, ըստ Օրէնքի, հրեաները զատկական գառը Զատկի տօնէն հինգ օր առաջ տուն կը տանէին:

Ծաղկազարդի նախօրեակ` Շաբաթ օրը, կը կատարուի նախատօնակ, կը բացուի Խորանի վարագոյրը, իսկ յաջորդ օրը տօնական Ս. Պատարագը կը մատուցուի բաց վարագոյրով:

Ծաղկազարդի առաւօտեան, եկեղեցիներուն մէջ կ’օրհնեն ձիթենիի կամ ուռենիի ոստեր և կը բաժանեն ժողովուրդին: Ուռենիի ոստերը, որոնք անպտուղ են, կը խորհրդանշեն հեթանոսները, որոնք պտղաբեր եղան միայն Քրիստոսին ընծայուելէն յետոյ: Ոստերու փափկութիւնը կը խորհրդանշէ Քրիստոսի հետևողներուն խոնարհութիւնը: Ուռենիի ճիւղերը մեր ընծաներն են Տիրոջը, ինչպէս Ս. Ծննդեան օրը Արևելքէն մոգերու բերած ընծաները:

Յիսուս Քրիստոս մուտք գործեց Երուսաղէմ որպէս Թագաւոր՝ խորհրդանշօրէն ցոյց տալով Իր՝ Փառքի թագաւոր ըլլալը, Ով՝ կը վերացնէ անէծքը և կենդանութիւն կը պարգևէ: Յիսուս եկաւ աւետարանելու աղքատներուն, բժշկելու սրտով բեկուածներուն, ազատելու գերիներուն և տեսողութիւն պարգևելու կոյրերուն, ինչպէս մարգարէացեր էր Եսայի մարգարէն: