1898 թուականին, Ամենայն Հայոց Կաթողիկոս Ն.Ս.Օ.Տ.Տ. Մկրտիչ Ա (Խրիմեան Հայրիկի) տնօրինութեամբ հիմնադրուեցաւ Ամերիկայի հայկական եկեղեցին, Ամերիկեան Միացեալ Նահանգներու եւ Գանատայի մէջ նորածիլ հայկական համայնքներուն հոգեւոր ու մշակութային կեանքի կարիքները հոգալու համար: 1930-ին, Գանատայի առաջին հայկական եկեղեցին հիմնադրուեցաւ Սենթ Գաթրինզի մէջ, սակայն միեւնոյն ժամանակ ստեղծուեցան Թորոնթոյի, Մոնթրէալի, Վանքուվըրի, Համիլթընի եւ Օթթուայի ծուխերը:

Մինչեւ 1984 թուականը գանատական ծուխերը կը գտնուէին ԱՄՆ Արեւելեան Հայոց Թեմի տիրախնամութեան ներքոյ (կեդրոնավայրը՝ Նիու Յորք): Այս ընթացքին էր, որ Գերշ. Տէր Թորգոմ արքեպիսկոպոս Մանուկեանը տարածաշրջանի փոխանորդներ նշանակեց, որոնց տիրախնամութեան տակ էին Գանատայի ծուխերը, նշանակումներու մեկնարկը հանդիսացաւ 1967-էն մինչեւ 1971 թուականի Գերշ. Տէր Վաչէ եպիսկոպոս Յովսէփեանի գործուղումը դէպի Մոնթրէալ, ապա անոր հերթաբար յաջորդեցին՝ Արժ. Տէր Զաւէն քահանայ Արզումանեանը (1971-1973), Արժ. Տէր Շնորհք քահանայ Գասպարեանը (1974), Գերշ. Տէր Արիս եպիսկոպոս Շիրվանեանը (1974-1978) եւ Գերշ. Տէր Վազգէն արքեպիսկոպոս Քէշիշեանը (1979-1983):

Գանատայի Հայկական եկեղեցւոյ առաջնորդներու խնդրանքներով, Ամենայն Հայոց Կաթողիկոս Ն.Ս.Օ.Տ.Տ. Վազգէն Ա-ի տնօրինութեամբ հիմնադրուեցաւ Գանատահայոց Թեմը: 1985-ի Մայիսին, առաջին Թեմական ժողովի ընթացքին, որոշում կայացաւ Մոնթրէալը ընդունիլ որպէս Թեմիս Առաջնորդարանի գտնուելու վայր եւ Գերշ. Տ. Վազգէն արքեպիսկոպոս Քէշիշեանը, որպէս առաջին Թեմակալ Առաջնորդ, մինչեւ անոր մահը` 1990-ին: Երջանկայիշատակ առաջնորդին յաջորդեց Գերշ. Տ. Յովնան արքեպիսկոպոս Տէրտէրեանը (1990-2003), այնուհետեւ, Գերշ. Տ. Բագրատ եպիսկոպոս Գալստանեանը (2003-2013), ապա Գերշ. Տ. Նաթան արքեպիսկոպոս Յովհաննիսեանը, որպէս Առաջնորդական տեղապահ (2013-14): Մայիս 2014-ին, Թեմական ժողովի ընտրութեամբ Գանատահայոց Թեմի հինգերորդ առաջնորդը դարձաւ Գերշ. Տ. Աբգար եպիսկոպոս Յովակիմեանը:

Գանատահայոց Թեմի առաքելութեան ծաւալը կը սփռուի Գանատայի չորս կողմի վրայ: Անոր հովանու ներքոյ կը գտնուին Մոնթրէալի, Թորոնթոյի, Սենթ Գաթրինզի, Համիլթընի, Վանքուվըրի, Լաւալի եւ Օթթաուայի ծուխերը: Կան նաեւ այլ ծուխեր, որոնք եկեղեցւոյ շէնքեր չունին ինչպիսին են՝ Միսիսական եւ Գալկըրին: Թեմն իր առաքելութիւնը կը ծաւալէ նաեւ այն քաղաքներուն մէջ, որոնք ունին հայկական փոքր բնակչութիւն ինչպէս՝ Էտմընթընը, Ուինիփեկը, Հալիֆաքսը, Քէպէք քաղաքը եւ Ելոնայֆը:

Առաջնորդարանի հետ կապ պահելու համար՝
Գանատահայոց Թեմ
615 Stuart Avenue, Outremont
Quebec, H2V 3H2
Հեռ.՝ 5142769479
Կայքէջ՝ www.armenianchurch.ca
Էլ. Հասցէ՝ contact@armenianchurch.ca